फलामे महिलाको निधन

लन्डन (एजेन्सी), चैत्र २७ - बेलायती पूर्व प्रधानमन्त्री मार्गरेट हिल्डा थेचर (बारोनेस थेचर) को हृदयघातको कारणले सोमबार बिहान ८७ वर्षको उमेरमा निधन भएको छ । बेलायत र संसारभरि फलामे महिलाको उपनामले परिचित उनले सन् १९७९ देखि १९९० सम्म कन्जरभेटिभ पार्टीको सरकारको नेतृत्व गरिन् ।
यो गरिमामय पदमा पुग्ने उनी बेलायतकै पहिलो र एक मात्र महिला पनि थिइन् । उनको नीतिलाई 'थेचारिज्म' भनेर बुझिन्छ ।  क्वीन मदर र राजकुमारी डायनालाई जस्तै सम्मानका साथ उनको अन्त्येष्टि गरिने सरकारले जनाएको छ । उनी सन् १९५९ मा उत्तरी लन्डनको निर्वाचन क्षेत्रबाट हाउस अफ कमन्सका लागि निर्वाचित भएकी थिइन् । उनी स्मरणशक्ति गुम्ने रोगबाट पीडित भएकीले निकै लामो समयदेखि सार्वजनिक समारोहमा सहभागी भएकी थिइनन् ।
उनको पति डेभिसको २००३ मा निधन भएको थियो । सरकार तथा दल सञ्चालनमा निकै दह्रो रूपमा प्रस्तुत हुने गरेकाले सञ्चार माध्यमहरूले उनलाई फलामे महिला -आइरन लेडी) को संज्ञा पनि दिएका थिए । शिक्षामन्त्री हुँदा सन् १९७५ मा पूर्वप्रधानमन्त्री एडवर्ड हिथलाई पार्टी नेतृत्वको मुद्दामा सफलताका साथ चुनौती दिइन् । उनले त्यसपछि सन् १९७९, १९८३ र १९८७ मा आमनिर्वाचन जितिन् । थेचरले सन् १९९२ मा हाउस अफ कमन्सको सदस्यता छाडिन् । अमेरिकाका राष्ट्रपति बाराक ओबामा, बेलायतकी महारानी एलिजावेथ द्वितीया, जर्मनकी चान्सलर एन्जिला मर्केल, बेलायतका प्रधानमन्त्री डेभिड क्यामरुन र भारतका प्रधानमन्त्री मनमोहन सिंहले थेचरको मृत्युलाई अन्तर्राष्ट्रिय राजनीतिमा अपूरणीय क्षति भन्दै शोक व्यक्त गरेका छन् ।
प्रकाशित मिति: २०६९ चैत्र २७ १०:४६