तीन वर्षअघि हराएकी छोरी खोज्दै अमेरिकी दम्पत्ति नेपालमा

'पत्ता लगाइदिनेलाई २२ लाख इनाम'

१५ बैशाख, काठमाडौं । आमाबाबुको माया आफ्ना सन्तानप्रति कति हुन्छ भन्ने कुरा एक अमेरिकी दम्पत्तिले देखाएका छन् । अमेरिकी दम्पत्ति पाउल साक्को र कोनी साक्कोले तीन वर्ष अगाडि पदयात्राको क्रममा हराएकी छोरीको मृत शरिर भएपनि भेटिन्छ कि भनेर नेपाल धाइरहेका छन् ।

ओब्रे कारोलाइन साक्को सन् २०१० अपि्रल २२ मा लाङटाङ पदयात्राको क्रममा हराएकी थिईन् । उनको अहिलेसम्म न त सास भेटिएको छ न त लाश नै । उनका बुवा आमा छोरीको खोजी गर्दै वर्षेनी नेपाल धाइरहेका छन् । बावु-आमाले अहिलेसम्म छोरी भेटिन्छे कि भन्ने आशा मार्न सकेका छैनन् । उनीहरुले पटक-पटक पत्रकार सम्मेलन गरेर छोरीको खोजी गरेर मर्दो जिउँदै पत्ता लगाईदिन नेपाल सरकारसमक्ष हार-गुहार गरिहेका छन् ।

बावु-आमाले छोरीको अवस्था पत्ता लगाउनेलाई २५ हजार अमेरिकी डलर अर्थात २२ लाख नेपाली रुपैयाँ दिन घोषणा गरिसकेको छ । नेपाल सरकारले छोरी खोजिदिने कार्यमा ढिला-चुस्ती गरेको हो कि भन्ने उनीहरुले शंका गरेका छन् । यहि कुरामा नेपाल सरकारलाई झकझकाउन उनीहरुले गत हप्ता काठमाडौंमा पत्रकार सम्मेलन गरेका थिए । नेपाल सरकारले भने मृतक पर्यटक साक्कोको खोजी कार्य जारि राखेको बताउँदै आएको छ ।

‘मृतक साक्को सन् २०१० अपि्रल २२ तरिखमा लाङटाङको लामा होटेलमा पिज्जा र कोक खाएर निस्केको थाहा हुन आएको छ’ नेपाल ट्रेकिङ एजेन्ट्स एशोसियसन अफ नेपाल (टान) का महासचिव मोहन लम्सालले अनलाइनखबरसँग कुराकानी गर्दै भन्नुभयो- ‘त्यसपछि उनी कहाँ गइन, कहाँ छिन, उनको अवस्था कस्तो छ भनेर पत्ता लाग्न सकेको छैन् ।’