प्रहरीको मोष्टवाण्टेड तीन जना पक्राउ

सिरहा , वैशाख १२ - हतियारको बलमा गुण्डागर्दी गर्दै आएका प्रहरीको 'मोष्ट वाण्टेड' सूचीमा रहेका तीन जनालाई ईलाका प्रहरी कार्यालय मिर्चैयाले पक्राउ गरी आज दिउसो सार्वजनिक गरेको छ ।
रामपुरविर्ता ३ का श्याम किशोर कापर, सोही ठाउका दिपेन्द्र कापर र अमोद भन्ने विजय कुमार मण्डललाई पक्राउ गरेको हो ।
इलाका प्रहरी कार्यालय मिर्चैयाका प्रहरी निरीक्षक नरेशराज सुवेदीका अनुसार उनिहरुले मिर्चैया क्षेत्रका व्यापारीहरुसंग हतियारको बलमा रकम असुल्ने र अपराधिक क्रियाकलाप गर्दै आएका थिए ।
सिरहाका प्रहरी प्रमुख प्रहरी उपरीक्षक मनोज न्यौपानेका अनुसार श्यामले वि.सं. २०६८ बैशाख २३ गते कर्जन्हा ७ स्थित पूर्व पश्चिम राजमार्गमा रामपुरविर्ता ५ घर भएका माओवादी नेता विन्देश्वर महतोलाई गोली हानी हत्या गरेको मुख्य अभियुक्त हुन् ।
यस्तै अमोदले गत कार्त्तिक २६ गते रामनगर मिर्चैया ३ स्थित राजमार्गमै माओवादी नेता श्रवण यादबमाथि गोली प्रहार गरी फरार अभियुक्त हुन् भने दिपेन्द्रले मल्हनिया खोरी ६ का मनोज कापरको घरमा प्रवेश गरी गोली फायर गर्नुका साथै मनोजलाई कुटपिट गरेका अभियुक्त हुन् ।
प्रहरी निरिक्षक सुवेदीका अनुसार गत चैत १३ गते मल्हनियाखोरीका स्थानीयबासी र रामपुरविर्ता तर्फ जाने विद्युतको लाईन काटिदिएको विषयमा सामान्य वादविवद हुादा अमोदले गोली प्रहार गर्न खोजेको र प्रहरीले लखेटेपछि फरार भएको थियो । भाग्ने क्रममा घटनास्थलबाटै प्रहरीले एक थान कटुवा पेस्तोल र सो पेस्तोलमा लाग्ने ६ राउण्ड गोली बरामद गरेको थियो ।