कोरियामा तीन नेपाली प्रहरीको शरणमा

सोल, वैशाख ९ - ईपीएसमार्फत रोजगारी गर्न कोरिया आएका तीन नेपाली कामदार प्रहरीको शरण पुगेका छन् । आफ्नै कम्पनी व्यवस्थापकले कुटपिट गरेपछि ज्यान जोगाउन ती नेपाली इच्छन प्रहरी कार्यालय पुगेका हुन् । ख्यङगीदो इच्छनस्थित मिरे कन्सल्ट नामक कम्पनीमा काम गर्न तीन महिनाअघि कोरिया आएका उनीहरूलाई व्यवस्थापक फेले भाषा नजानेको भन्दै पटक-पटक कुटपिट गरेको थिए । कोरियामा भाषा नजानेकै कारण कुटिने प्रवासी मजदुरको संख्या दिनदिनै बढिरहेको छ ।
त्यसरी कुटिनेमा गुल्मीका विक्रम जोशी, धरानका रामकुमार राई र पोखराका मोहन अधिकारी छन् । आल्मुनियमको फ्याल-ढोका बनाउने उक्त कम्पनीमा चार नेपाली र कम्बोडियाली, चिनियाँसहित ११ प्रवासी मजदुर कार्यरत छन् । कम्पनीमा आएदेखि नै कुटपिट गरेपछि बुधबार प्रहरीको शरणमा परेको पीडितले बताए ।
इच्छन प्रहरी कार्यालयले कम्पनीका मालिक रु जङ हयन र व्यवस्थापक फेसँग बयान लिएको छ । बयानमा मालिक हयनले कम्पनी व्यवस्थापनबाट गल्ती भएको स्वीकारेका छन् । 'मेरो व्यवस्थापकबाट भएको गल्तीप्रति म दुःखी छु, पीडितहरूको चाहना के छ त्योअनुसार गर्न तयार छु ।' मालिक रुले बयानमा भनेका छन् । बयानपछि मालिक तथा व्यवस्थापक दुवैले आत्मालोचना गर्दै पीडित कामदारसमक्ष माफी मागेका छन् ।
प्रहरी कार्यालयका अधिकृत सीन ग्यङ छलले नेपाली कामदारले आवश्यक ठाने मुद्दा दर्ता गर्न सहयोग गर्नेसमेत बताए । उनले पीडित कामदारको स्वास्थ्य परीक्षण गर्नुपर्ने सल्लाह दिए पनि कम्पनीले हालसम्म मेडिकल कार्ड उपलब्ध नगराएकाले स्वास्थ्य परीक्षण्ामा समस्या भएको पीडितले उल्लेख गरे ।
त्यसैगरी इन्छन औद्योगिक क्षेत्रको जिन योङ कम्पनीमा कार्यरत रमेश थापालाई कोरियाली कामदार छोले बिहीबार कुटपिट गरेका छन् । छोको कुटाइबाट थापाको घाँटी र शरीरको अन्य भागमा चोटपटक लागेको छ । थापाको उपचार र कानुनी सहयोग कोरिया साना तथा मझौता उधोग महासंघका कर्मचारी वाङदी लामाले सहयोग गरेका छन् । प्राथमिक उपचारपछि थापा आज कम्पनी फर्केका छन् ।
दुवै स्थानको घटनालाई सोलस्थित नेपाली दूतावासले अध्ययन गरिरहेको र दुव्र्यवहार गर्ने कम्पनीहरूलाई निगरानीमा राखिने श्रम सहचारी अनिलकुमार गुरुङले बताए । 'साहुले नभई कामदारले दुव्र्यवहार गरेकाले कालोसूचीमा राख्न मिलेन,' गुरुङले भने, 'हामीले अध्ययन गरिरहेका छौं, आवश्यक परे कालोसूचीमा समेत राख्न सक्छौं ।' कामदार कुटपिट तथा दुव्र्यवहार गर्ने कम्पनीलाई नेपाली दूतावासले कालोसूचीमा राख्ने गरेको छ । कालोसूचीमा परेका कम्पनीले पुनः नेपाली कामदार लिन पाउँदैनन् ।