बलात्कार आरोपी पक्राउ

पाल्पा, वैशाख २३ - स्याङ्गजा साखर गाविस वडा न ६ की १८ बर्षीय एक युवतीमाथि गत बुधबार सामूहिक बलात्कारको आरोपमा एक जना पक्राउ परेका छन् ।  साँखर ९ का २० बर्षीय सोनु बिकलाई इलाका प्रहरी कार्यालय रत्नपुर स्याङ्जाले पक्राउ गरेको हो । थप दुईजनाको खोजी कार्य साथै घटनाको अनुसन्धान भइरहेको इप्रका प्रमुख कुमारजी श्रेष्ठले बताए ।
पाल्पा रामपुरबाट औषधी उपचार गरेर घरतर्फ फर्किदै गर्दा घर नजिकैको जंगलमा बेलुका करिव ६ बजेको समयमा ती युवतीमाथि सामूहिक बलात्कार भएको आफन्तले बताएका छन् । लुम्विनी मेडिकल कलेजको चिकित्सक ल्याब रिपोर्टमा बलात्कारको प्रयास भएको तर भइनसकेको जानकारी दिएको छ  । मेडिकल कलेजमा उपचार गराइरहेकी बिरामी युवतीले पनि आफुलाई बलात्कार प्रयास गर्दा भएको प्रतिकारमा चोटपटक लागेको बताएकी छिन् । जिल्ला प्रहरी कार्यालय पाल्पाका प्रमुख स्थानेश्वर रेग्मीले युवतीको उपचार भइरहेको र उपचारपछि सामान्य वन्दै गएको बताए ।
बिहान साखरबाट औषधी लिन पाल्पा रामपुर बजारमा आएको र औषधी गरी वेलुका घर फर्किदै गर्दा बाटोमा घटना भएको आफन्तहरुले बताए । पीडित युवतीले प्रतिकार गर्ने क्रममा मुख, गाला, घाटीमा चोट लागेको छ । उनको तानसेनको लुम्बिनी मेडिकल कलेजमा उपचार  भइरहेको छ । घाईते युवतीले २ वटा मोटरसाईकलमा आएका ३ जना व्यक्तिहरुले आफूलाई बलात्कार प्रयास गरेको बताउादै आएकी छन् ।